Schönebuch hell

Sketch, gehalten  an der Auf der Maur Tagung vom 23. Mai 2004 im Mythen Forum

Der nachfolgende Text wurde unter der Regie von Hans Auf der Maur von Lucia Koller - Auf der Maur und Aurelia Imlig - Auf der Maur gesprochen. Die Bilder wurden mit einem Beamer an die Rückseite der Bühne projiziert.

Auf der Maur Tagung
Das isch au es Uff der Mur Huus. Hütt ghört's a de Famili Wiget -Studer. 1572 heds de Hauptmaa Gilg uff der Mur buue. Und da denäbed zueche heisst's Lützeltal.
Auf der Maur Tagung
Lützel – du heissisch doch Lützel. Lützeltal chund sicher vo Lucia-Tal. 
Ja Chabis! Das hed früener Utzetal gheisse. E Niclaus uff der Mur isch um 1430 vo Schönebuech ufe Dägeberg zoge und sini Nachkomme under anderem i das Utzetal.
Jä, de sind mier Uff der Murig vo Schönebuech? 
Ja sauft! Am Fusse des Fronalpstockes gelegen. ( singen „ Mier sind vo Schönebuech" nach Rufst du mein Vaterland)
Auf der Maur Tagung
Wemmer scho vo Schönebuech sind, gömmer jetz au uf Schönebuech. Bevor's obsi gaad, wemmer doch nu e chli singe. ( singen „ Ich bi e luschtige Musikant vom urchige Schwyzerland). Was kannst du  spielen? Ich spiele die Klarinette. Z'Aaloch uf und z'Beeloch zue …. )
Auf der Maur - Tagung
Duu, da unde sind z'Lüönde im Salach und da obe linggs isch Pension Betschart. Da chund mer grad nu i Sinn, da hemmer doch allig 
gsunge „Dure Salach uf gäg z'Betschart's zue…….)
Auf der Maur Tagung
Du, isch das waar, dass z'Schönebuech einisch schier nüüd anders gää hed als Uff der Murig? Uf jedem Hof Uff der Mur? Isch das nid e chli Inzucht gsii? 
Ja, Inzucht isch villicht e chli übertribe. - Die hend halt für Nachwuchs i de eigene Reihe gsorgt, nachem Motto: Ehret einheimisches Schaffen und küsst Schönebüechler Frauen
Auf der Maur Tagung
Ja, de isch ja das grad schier gsii wie z'Villgau. Im Uff der Mur Buech hani gläse, im 16. Jh. heigid zwee Uff der Mur Brüedere zwee Schwöschtere von Rotz us Nidwalde ghürate. Zum Glück chasch säge, susch wär's de nid oni Albinos abgange.
Auf der Maur Tagung
Jetz simmer da dur d'Gass ufe cho und da hindere giengs jetz zur Suworowbrügg. – Und det wär jetz äbe z'Stammhuus vo allne Uff der Mur.
Auf der Maur Tagung
Hee, wo isch jetz da die Muure, wo der erscht Uff der Mur druf ghocket isch? – Ich han einisch ghört, es siig es Findelchind gsii. 
Nei, dumms Lappizüüg! Mur isch e Ligeschaft und der, wo uf der „Mur" wonnt und buured, isch der Uff der Mur. Das under de  Strass und das Land deruf bis is Eggeli ufe hed einisch zur Mur ghört.
Du, jetz chönntid mier doch zum Uff der Mur is Stammhuus ine es Kafi gu ha?
Du, das isch verbi. Da sind scho lang kei Uff der Muur me druf. Da  wonnt hüüt de Wisel Betschart-Ulrich. Chumm mier gönd nu chli deruf  gäge die hüttig Muur zue.
Auf der Maur Tagung
Du jetzt chund mer nu öppis i Sinn. Bi de Suworowbrügg hinne hend doch damals d'Russe gäge d'Franzose kämpft. Das chönnt doch guet sii, dass die Franzose damals a de Uff der Mur „Sur le mur" grüeft hend.
Meinsch du? Jää, Uff der Mur chasch halt guet übersetze! Uf latinisch: Super murum. Uf änglisch: On the wall. Uf japanisch: ...
Auf der Maur Tagung
Und uf russisch heisst's: Murofsky. Hee! Lueg einisch die Ussicht! Gäge Brunne, gägem Urmiberg. Rossberg, Hochstuckli, Mythe. – Warum sind au die Uff der Murig schier all vo hie e wägg? - Bi dere Ussicht!? 
Ja weisch, im Fäld unne isch halt ringwärchiger, und länger Sunne hend's au.
Ja, es isch glich schaad. Me müesst halt es Wider-Aasidligs - Projekt starte. Weisch, wie de vom Tierpark mit de Bartgeier. 
Du hesch au Ideeä! – He halt, da chunnt mer i Sinn: Da isch  einisch e Uff der Mur uf Schönebuech zrugg choo. E Balz Uff der Mur siig vor öppe hundert Jahre vom Bifang im  Fäld unne wider i d'Schwändle ufezoge. Weisch warum?  Er chönng am Hang obe midere Burdi liechter uufstaa als dunne im  äbene Fäld.

<Artikel drucken


Copyright by Auf der Maur - Komitee / CH-6430 Schwyz